170 సీసీటీవీలు, 100 కి.మీ. ఛేజింగ్.. బాలుడి కిడ్నాప్ కేసు సుఖాంతం!

గుజరాత్‌లోని అమ్రేలి జిల్లాలో కిడ్నాప్‌కు గురైన ఐదేళ్ల బాలుడిని పోలీసులు చాకచక్యంగా వ్యవహరించి గంటల వ్యవధిలోనే రక్షించారు. కేవలం 15 గంటల్లో 170కి పైగా సీసీటీవీ కెమెరాలను విశ్లేషించి, దాదాపు 100 కిలోమీటర్ల దూరం నిందితుడిని వెంబడించి పట్టుకున్నారు. సినిమాను తలపించిన ఈ ఆపరేషన్ అందరినీ ఆశ్చర్యపరిచింది.

అమ్రేలి జిల్లా మోటా అంకడియా గ్రామంలో ఈ ఘటన చోటుచేసుకుంది. మధ్యప్రదేశ్ నుంచి వలస వచ్చిన రైతు కూలీల దంపతుల 5 ఏళ్ల కుమారుడు కిడ్నాప్‌కు గురయ్యాడు. నిందితుడు లలిత్ రూప్‌సింగ్‌భాయ్ జామ్రే (25) కూడా మధ్యప్రదేశ్‌కు చెందినవాడే. ఆరు నెలల క్రితం బాధితుడి కుటుంబంతో పరిచయం ఏర్పరచుకున్న లలిత్, పది రోజుల క్రితం తిరిగి వచ్చి పని దొరికే వరకు ఆశ్రయం కోరాడు. ఈ క్రమంలోనే బాలుడిని అపహరించుకుపోయాడు.

నిందితుడు తన వెంట మొబైల్ ఫోన్ తీసుకువెళ్లకపోవడంతో ఫోన్ ట్రాకింగ్ ద్వారా పట్టుకోవడం పోలీసులకు కష్టసాధ్యంగా మారింది. దీంతో రంగంలోకి దిగిన పోలీసులు, ఐదు ప్రత్యేక బృందాలను ఏర్పాటు చేసి దర్యాప్తు ముమ్మరం చేశారు. అమ్రేలి నుంచి రాజ్‌కోట్ వైపు నిందితుడు మోటార్‌సైకిల్‌పై వెళ్లిన మార్గాన్ని గుర్తించారు. నెట్‌రామ్, త్రినేత్ర కమాండ్ సెంటర్ల సాయంతో రాజ్‌కోట్-పోర్‌బందర్ జాతీయ రహదారి, బస్ స్టాండ్లు, రైల్వే స్టేషన్ల పరిధిలోని 170కి పైగా సీసీటీవీ ఫుటేజ్‌లను జల్లెడ పట్టారు.

దాదాపు 100 కిలోమీటర్ల దూరం వెంబడించిన తర్వాత, రాజ్‌కోట్ జిల్లా విర్‌పూర్ గ్రామంలో నిందితుడిని అదుపులోకి తీసుకున్నారు. బాలుడిని సురక్షితంగా కాపాడి, తల్లిదండ్రులకు అప్పగించారు. బాలుడిపై ఏర్పడిన ఇష్టంతోనే అతడిని తన సొంతూరు మధ్యప్రదేశ్‌కు తీసుకెళ్లాలని నిందితుడు భావించినట్లు పోలీసులు ప్రాథమికంగా నిర్ధారించారు. ఈ ఆపరేషన్, ఆధునిక టెక్నాలజీ, వివిధ జిల్లాల పోలీసుల సమన్వయం, మానవ మేధస్సు కలయికకు నిదర్శనంగా నిలిచింది.